Ezîz Xemcivîn
Va ye diçim serdana warê pîroz
Miletê resen, dilovan û dilsoz
Mistek av ji kaniya spî vexwim
Canê xwe mor bikim bi peyman û soz
Sibeha cejnê ye, diçim Lalişê
Çi gul li bejnê ye, diçim Lalişê
Rojek ji jînê ye, diçim Lalişê
Rastiya xewnê ye, diçim Lalişê
Kolan bi kolan firişte û perî
Cîhana min e, ciwan û gulzerî
Ba û baran e gulava enberî
Evîna dildar, tenê ew yekderî
Lalişa ola kevnar, tenahî ye
Hetava li ser herdem ronahî ye
Diçim berê min li çarşema sor e
Asmanê perestgeha min sahî ye
16.04.2024
