Ermanc ji vê hevkariyê ew e ku em bi hev re li ber roniya Înîsiyativa Partiyên Tevgera Kurd li Sûriyê û biryarên wê xebata xwe li pênawî xalên jêrîn hîn xortir bikin:
1. Peydakirina piştgiriya siyasî, di asta navnetewî de, ji daxwaz û viyana xelkê Sûriyê û şoreşa wê ya pîroz re;
2. Danhev û yekxistina hêzên rikberiya sûrî bona piştgiriya şoreşê û bilindkirina dengê wê li dervayî welêt;

Daxuyaniya Konfiransa Rêxistinên Ewropa yên
Partiyên Tevgera Niştîmanî yên Kurd li Sûriyê
Dortmund, 02.-03.07.2011


Piştî bêtirî sê meh û nîvan ji temena serhildana gelêrî ya pîroz li Sûriyê hîne jî rêjîma Şamê ya totalîter ji dêvla ku guh bide daxwazên rewa û dadmend yên xwepêşandêran, bi şêweyên curecur yên hov û dirinde dide xwe ku stemkarî û desthilatiya xwe biparêze. Pêşî wê dest bi sozên vala û derew kir, pişt re jî ragihandina xwe ya derewkar bi kar anî, li dawiyê jî hovîtiya xwe û dezgehên xwe yên leşkerî û ewlekariyê bi kar anîn. Di encamê de ta îro roj bi hezaran şehîd û birindar ketin, gelek kes jî hatine girtin û ”wendakirin”, gelekên din jî hatine koçbarkirin.

Tevgera me ya Kurd li Sûriyê ji roja pêşî de eşkere û zelal ji rêjîmê xwastin ku dest bi guhartinên demokrat bike, da ku xelk û welat bên parastin û dilopeke xwînê jî nerije. Lê mixabin, rêjîmê guh ne da van daxwazan û bi serhişkî û hovîtiya xwe têkelî rewşê bû. Îro roj jî serkirdayetiya tevgera me di wê baweriyê de ye ku riya herî rast ji çareserkirinê re ew e ku kongireke niştîmanî ye giştî li dar keve, da ku pêşeroja Sûriyê bête guftoguhkirin û pêngavên pêşîn ji avakirina welatekî demokrat û nûjen re bêne avêtin û destûreke demokrat bête amadekirin, ya ku tê de rastiya Sûriyê ya dîrokî û erdnîgarî bê parastin û hebûna gelê kurd û mafên wî yên netewî bên naskirin û bicihkirin. Ji bo ku ev daxwaz bi ser bikeve helbet pir girîng e ku:

1. serhildan bi hemû awayan û bi şêweyên aştiyane berdewam bike;
   
2. piştgiriya siyasî û dîplomasî ji miletê Sûriyê û daxwazên wî yên rewa re bête peydakirin û
   
3. berî her tiştî jî yekkirina hêza tevgera kurdî û ya rikberiya sûrî serûber.
   

Di vê çarçewê de Tevgera Kurdî ji aliyekî de navmala kurdî da ser hev û çarçewa xwe ya netewî ”Partiyên Tevgera Niştîmanî ya Kurdî” damezrand û înîsiyativa xwe bona çerserkirina buhrana Sûriyê pêşkêş kir, hem jî gelek hewildanên bona yekxistina hêzên rikberiya sûrî pêk anîn.
Da ku li Ewropa jî tevgera me ya kurd kari be baştir bi rola xwe di warê dîplomasî û têkiliyan de, nemaze jî di warê têkiliyên bi hêz û partiyên rikberiya sûrî re, bilîze û kari be bêhtir li maf û berjewendiyên gelê kurd li Sûriyê xwadî derkeve me weke Rêxistinên Ewropa yên Partiyên Tevgera Kurd li Sûriyê roja 02.-03.07.2011-ê di konfiransekê de hevbendiyek di nav xwe de damezrand û komîteyên xwe (Komîta Serkirdayetiyê, Komîta Rêzanî, Rêveber) li gor tozikeke navxweyî destnîşan kirin.
Ermanc ji vê hevkariyê ew e ku em bi hev re li ber roniya Înîsiyativa Partiyên Tevgera Kurd li Sûriyê û biryarên wê xebata xwe li pênawî xalên jêrîn hîn xortir bikin:
1.   Peydakirina piştgiriya siyasî, di asta navnetewî de, ji daxwaz û viyana xelkê Sûriyê û şoreşa wê ya pîroz re;
2.   Danhev û yekxistina hêzên rikberiya sûrî bona piştgiriya şoreşê û bilindkirina dengê wê li dervayî welêt;
3.   Bervedêriya maf û daxwazên rewa yên gelê kurd di hemû têkilî û danûstandinên xwe bona bicîkirina mafên me yên netewî di destûra Sûriyê ya pêşerojê de.

Herweha biryar di konfiransê hate standin ku divê ev hevkariya me ya siyasî kesayetiyên kurd yên serbixwe û dezgeh û komeleyên revenda kurd li Ewropa kom ser hev bike û sûdê ji wan û şiyanên wan werbigre, da ku em bi hev re rajeya doza xwe ya netewî û niştîmanî bikin.

·         Serberzî bo şehîdên azadiyê, nemirî bo semkaran
·         Bijî azadî, demokrasî û wekhevî


03.07.2011
Hevkariya Rêxistinên Ewropa yên Partiyên Tevgera Kurd li Sûriyê