bêhriya wê, tîna şewatê ye
ku her destê sibê
wek findekê di giyanê ewran de diçirise
û bi rojava  re
dadiwerive mista axê
Dibe ku ev tişt gulek be
li ber pencereya we
Yan li ber deriyê Laleşê
siya giyanê min be.

Piştî nîvê şevê bi hinekî
ezê tevdîrên helbestekê ji we re birêsim
ku her êvar xwe bi maç û meyê dinexşîne
kevokên deştê li gorî yasayên xirecirê
ji paxila xwe difrîne
û bi kevalan re yên ku li dîwarên malê dardakirî diaxive
tilîyên xwe di ser sawa nexşeyên wan re dibe
bi hûrbînî valahiya ku ji newqa laşan ketiye dipelîne
Di vê kêlîka ku ew bi wêneyan mijûle
gewriya rojnameyê dilop dike
û katjimêr di riwê avê de diqîre.

Piştî nîvê şevê bi hinekî
Ezê leylana wêneyekî
ku li kuçekî ji vê cîhanê lidarketibû
Ji we re veçirim
destin şeyda
di bêrîkên deryayê de wenda bûn
çavin hêvîdar
bi têlên sînoran ve rijiyan
û rê li sozê pêgavên wan mikurnehatin
Giyanin xweşik û westiya yî ji hilgirtina alafan
hêlînên xwe berdan û ji laşên xwe terqiyan
Gelek dest
Gelek çav
Gelek giyan
Hilm û henaseya buharê  bûn
Lê bûn siya giyanê vê helbestê.